Монголын хөрөнгийн биржид шинээр бүртгэгдсэн “ЛэндМН ББСБ” ХК нь хөрөнгийн зах зээлийн мэргэжлийн оролцогч нарт зориулан үнэт цаасны танилцуулга хийлээ. Тус компани олон нийтэд нээлттэй хувьцаат компани болж нийт хувьцааны 25 хувийг олон нийтэд санал болгох бөгөөд татан төвлөрүүлсэн хөрөнгөө үндсэн үйл ажиллагаа буюу зээлийн эх үүсвэрт 100% зарцуулж үйл ажиллагаа өргөжүүлэн ажиллахаар төлөвлөж байна.
“ЛэндМН ББСБ” ХК нь хиймэл оюун ухаанд суурилсан финтек /Fintech/ буюу цоо шинэ санхүүгийн бизнес моделийг Монголын улсын санхүүгийн салбарт 2016 онд анх удаа нэвтрүүлсэн юм. Тус компани нь өөрийн LendMN аппликейшнээр дамжуулан барьцаагүй, хямд өртөгтэй, хэрэглээний цахим зээлийн үйлчилгээг иргэдэд үзүүлдэг.
“ЛэндМН ББСБ” ХК-ийн андеррайтераар “Мирэ эссет секьюритис Монгол ҮЦК” ХХК ажиллаж байгаа бөгөөд үнэт цаасны захиалгыг 2018 оны 2 дугаар сарын 21-ний өдрөөс 2018 оны 3 дугаар сарын 07-ны өдрийн 13 цаг хүртэл авна.
МОНГОЛЫН ХӨРӨНГИЙН БИРЖ
