Монголын хөрөнгийн биржийн 1-р ангилалд бүртгэлтэй "Монгол шуудан" ХК-ийн 2020 оны эхний хагас жилийн санхүү, үйл ажиллагааны тайланг Стратеги, бизнес хөгжил хариуцсан дэд захирал Н.Хосбаяр үнэт цаасны компаниудын шинжээчид болон цахим сүлжээгээр дамжуулан олон нийтэд танилцууллаа. Тайлант хугацаанд тус компани нь шуудангийн уламжлалт нэр төрлийн бүтээгдэхүүнийг хөгжүүлж, өрсөлдөх чадварыг нэмэгдүүлэхэд голлон анхаарч ажилласан бөгөөд дараах голлох үр дүнд хүрчээ. Үүнд: 

• Гараас гарт хүргэлтийн үйлчилгээг өргөжүүлж, энэ төрлийн үйлчилгээний орлогыг 69 хувиар нэмэгдүүлэв. 

• Аймаг, хот хоорондын шуудан тээвэрлэлт, логистик үйлчилгээг өргөжүүлэн, өөрийн тээврээр хойд, урд, зүүн чиглэлийн нийт 11 аймаг уруу тогтмол хуваарийн дагуу тээвэрлэлт хийдэг болов. 

• Ковид19 цар тахлаас урьдчилан сэргийлэх ажлын хүрээнд 9 их, дээд сургуультай хамтран ажиллаж, нийт 5000 гаруй төгсөгчийн дипломыг хаягийн дагуу хүргэв. Мөн тусгай үүргийн 25 нислэгээр гадаад шуудан солилцох горимд шилжив. 

• ОХУ-БНХАУ, БНХАУ-Украйн, Эстон улс уруу дамжин өнгөрөх шуудан тээвэрлэв. 

• Eurogiro байгууллагатай байгуулсан хамтран ажиллах гэрээний хүрээнд БНСУ-ын шуудангаар дамжуулан улс хоорондын мөнгөн гуйвуулгын үйлчилгээ үзүүлэхээр болсон бөгөөд уг үйлчилгээг  “Ард кредит ББСБ” ХК-тай хамтран гүйцэтгэхээр боллоо.

• 2020 оны эхний хагас жилд 7.3 тэрбум төгрөгийн орлоготой ажилласан нь өмнөх оны мөн үеэс 398.2 сая төгрөгөөр буюу 5 хувиар өссөн боловч шинээр хэрэгжүүлж байгаа транзит тээврийн үйл ажиллагаатай холбоотой үйл ажиллагааны зардал болон орон нутгийн ажилчдын цалингийн зардал нэмэгдэж, улмаар эхний хагас жилд 3 сая төгрөгийн ашигтай ажилласан байна.

"Монгол шуудан" ХК-ийн олон нийтэд нээлттэй танилцуулсан тайланг бүрэн эхээр нь Энд дарж үзнэ үү.

МОНГОЛЫН ХӨРӨНГИЙН БИРЖ