Өнөөдөр /2025.01.31/ “Монголын хөрөнгийн бирж” ХК-ийн Гүйцэтгэх захирлын үүрэг гүйцэтгэгч Б.Дөлгөөн Аж үйлдвэр, Эрдэс баялгийн сайд Ц.Туваан, сайдын зөвлөх Л.Чой-Иш, Аж үйлдвэр, Эрдэс баялгийн яамны Эрдэс баялгийн газрын дарга Г.Намчинсүрэн, Хуулийн хэлтсийн дарга Т.Ганбаатар нарын төлөөллийг хүлээн авч, уул уурхайн бүтээгдэхүүний арилжааны үйл ажиллагаагаа танилцууллаа.

Уулзалтын үеэр “Монголын хөрөнгийн бирж” ХК-ийн Гүйцэтгэх захирлын үүрэг гүйцэтгэгч Б.Дөлгөөн “Уул уурхайн бүтээгдэхүүн арилжааны өнөөгийн байдал” сэдэвт танилцуулга хийж, арилжаанд тулгамдаж байгаа асуудлуудыг хэрхэн шийдвэрлэх гарц болон одоо хэрэгжүүлж байгаа ажлуудаа онцоллоо.

Мөн уул уурхайн бүтээгдэхүүний ханшийн уналттай холбоотойгоор арилжааны идэвх буураад байгаа хэдий ч шинэ бүтээгдэхүүн, үйлчилгээ нэвтрүүлж, худалдан авагчдыг идэвхжүүлэх замаар арилжааг нэмэгдүүлэх чиглэлд онцгой анхаарч ажиллахаар санал солилцов. Түүнчлэн уул уурхайн бүтээгдэхүүний арилжааг нэмэгдүүлэхэд Аж үйлдвэр, Эрдэс баялгийн яам, салбар агентлагийн түвшинд дэмжлэг үзүүлж ажиллахаа илэрхийлэв.

МОНГОЛЫН ХӨРӨНГИЙН БИРЖ