СЭЗИС-ийн Ахисан түвшний сургуулиас санаачлан эхлүүлсэн SCIENCE NAADAM-2025 “Нээлттэй шинжлэх ухаан ба тогтвортой хөгжил” сэдэвт конференцийн үндсэн хуралдаан 2025 оны 05-р сарын 09-ний өдөр Шангри-Ла зочид буудлын хурлын танхимд зохион байгуулагдсан.

Үндсэн хуралдаан нь УИХ, үндсэн хуулийн цэц, төрийн яамд, зохицуулах байгууллагууд, төрийн өмчит хувьцаат компани, бизнес, банк санхүү, эрүүл мэнд, дээд боловсрол болон инновац гарааны бизнес эрхлэгчдийн төлөөлөл 170 гаруй оролцогчийн бүрэлдэхүүнтэй эхэлсэн юм.

Харин өнөөдөр (2025.05.16) Санхүүгийн зах зээлийн судалгааны хүрээлэнгийн “Санхүүгийн зах зээл ба тогтвортой хөгжил” сэдэвт салбар хуралдаан “Монголын хөрөнгийн бирж” ХК-ийн MSE hall-д зохион байгуулагдлаа.

Тус хуралдаан нь:

• Хөрөнгийн зах зээл ба тогтвортой хөгжил

• Даатгалын зах зээл ба тогтвортой хөгжил

• Банк бус санхүүгийн зах зээл ба тогтвортой хөгжил дэд хэсгүүдээс бүрдсэн бөгөөд “Монголын хөрөнгийн бирж” ХК, Санхүүгийн зохицуулах хороо, Монголын Үнэт Цаасны Арилжаа Эрхлэгчдийн Холбоо, СЭЗИС, Даатгалын салбар, ББСБ-ын удирдлага, төлөөллүүд үндсэн илтгэлүүдийг танилцуулж, хэлэлцүүлэг өрнүүлсэн.

СЭЗИС-ийн Ахисан түвшний сургуулийн захирал Б.Бүжинлхам арга хэмжээг нээж хэлсэн үгэндээ: 

"Өнөөдрийн салбар хуралдааны үндсэн сэдэв нь СЭЗИС-ийн Стратегийн тэргүүлэх чиглэлийн нэг Санхүүгийн зах зээл, санхүүгийн зах зээлийн судалгааны чиглэл юм. Энэ нь зөвхөн шинжлэх ухааны ойлгоход төвөгтэй, амьдралаас тасарсан сэдэв биш. Олон талын оролцоо, судалгаа шинжилгээний үр дүнд хамтын шийдэл олох чухал сэдэв. Тиймээс энэхүү салбар хуралдаанд эрдэмтэн судлаач, салбарын мэргэжилтнүүд, оюутнууд маань энэ сэдвийг хөндөн авч үзнэ” гэдгийг онцоллоо.

Энэ үеэр “Монголын хөрөнгийн бирж” ХК-ийн Бизнес хөгжлийн газрын захирал Т.Хаш-Эрдэнэ “Тогтвортой хөгжилд хөрөнгийн зах зээлийн оролцоо” сэдвээр илтгэл тавьсан юм.

Тэрээр үндсэн сэдвийн хүрээнд төр засгийн бодлого шийдвэртэй уялдуулан МХБ-ээс авч хэрэгжүүлж болохуйц бодлогын арга хэмжээний талаар дараах дэд сэдвүүдээр дэлгэрэнгүй мэдээлэл өгсөн.

Үүнд:

• Банкны нэмэлт хувьцааг биржээр дамжуулан гаргах

• Төрийн өмчит компаниудын IPO гаргах ажиллагааг эрчимжүүлэх

• Стратегийн ач холбогдол бүхий ордуудын эдийн засгийн үр өгөөжийг дээшлүүлэх

• Тэтгэврийн шинэчлэл болон мэргэжлийн хөрөнгө оруулагч

• “Эрдэнэс Тавантолгой” ХК-ийн хувьцааг эдийн засгийн эргэлтэд оруулах

• Тогтвортой хөгжлийн зорилтод чиглэсэн үйл ажиллагаа                                                

• Ногоон бонд болон БОНЗ-ын стандартын хэрэгжилтийн тайлагналын талаарх мэдээллийг тус тус тоймлон танилцууллаа.

МОНГОЛЫН ХӨРӨНГИЙН БИРЖ