“Монголын хөрөнгийн бирж” ХК санаачлан "Үнэт цаасны төвлөрсөн хадгаламжийн төв" ХХК, "Монголын үнэт цаасны арилжаа эрхлэгчдийн холбоо" ГҮТББ-тай хамтарч олон нийтийн санхүүгийн боловсролыг дээшлүүлэх, хөрөнгийн зах зээлийн талаарх мэдлэг, мэдээллийг нэмэгдүүлэх зорилгоор 2025 оны 6 дугаар сараас тус өдөрлөгийг Өмнөговь, Дундговь аймгуудад зохион байгуулж эхэлсэн.

“Хөрөнгийн зах зээл ба 1072 хувьцаа” үнэт цаасны зах зээлийн нээлттэй өдөрлөгийг өнөөдөр (2026.06.09) Архангай аймгийн Цэцэрлэг суманд зохион байгууллаа.

“Монголын хөрөнгийн бирж” ХК-ийн МОНХА-ны ахлах мэргэжилтэн П.Нямдорж Хөрөнгө оруулалт, хөрөнгийн зах зээлийн мэдлэг олгох сургалт орж, Монгол Улсын Засгийн газрын шийдвэрээр 1991 онд иргэдэд өмч хувьчлалын эрхийн бичиг хэлбэрээр олгогдсон цэнхэр, ягаан тасалбар болон "Эрдэнэс тавантолгой" ХК-ийн үйл ажиллагаа, хувьцаа, бүртгэл, тоо хэмжээ, ногдол ашгийн талаарх мэдээлэл өглөө. 

Түүнчлэн тус аймагт үйл ажиллагаа явуулдаг "Гүүдсек ҮЦК" ХХК-ийн Гүйцэтгэх захирал У.Энхтайван иргэд хөрөнгийн зах зээлд хэрхэн хөрөнгө оруулалт хийх талаар дэлгэрэнгүй мэдээлэл хүргэсэн юм.

Өдөрлөгт нийт 130 гаруй иргэн хамрагдаж, тэдгээрээс 90 орчим иргэн “Үнэт цаасны төвлөрсөн хадгаламжийн төв” ХХК-ийн мэргэжилтэнд хандаж цэнхэр, ягаан тасалбарын мэдээллээ шүүлгэлээ.

МОНГОЛЫН ХӨРӨНГИЙН БИРЖ