“Монголын хөрөнгийн бирж” ХК хөрөнгийн зах зээлийн хөгжил, хөрөнгө оруулалтын орчны тогтвортой өсөлтийг дэмжих бодлогын хүрээнд дотоодын брокер, дилерийн компаниудын шинжээчдийн мэргэжлийн ур чадвар, судалгаа шинжилгээний чадавхыг нэмэгдүүлэх зорилгоор "Хөрөнгийн зах зээлийн мэргэжлийн шинжээчдэд зориулсан хөгжлийн сургалт" (2026.06.18) зохион байгууллаа.

Тус сургалтаар хөрөнгийн зах зээлийн мэргэжлийн, мэргэшсэн шинжээч нар дараах сэдвүүдийн хүрээнд мэдээлэл өгсөн юм. Үүнд:

• Макро эдийн засгийн үндсэн үзүүлэлтүүдийн хөрөнгийн зах зээлд үзүүлэх нөлөөллийн механизм

• Багцын удирдлагын орчин үеийн чиг хандлага, практик хэрэглээ

• Хөрөнгийн зах зээлийн техник шинжилгээ, аргачлал;

• Хувьцааны үнэ, үнэлгээг тооцох аргууд

“Монголын хөрөнгийн бирж” ХК нь салбарын экспертүүдийн мэргэшлийн үнэ цэнэд тулгуурлан хөрөнгө оруулалтын шийдвэр гаргалтад шаардлагатай компанийн бодит үнэ цэнийг тодорхойлох санхүүгийн загварчлал, харьцуулсан үнэлгээний аргуудад суурилан дүгнэлт хийх ур чадварыг хөгжүүлэхэд энэхүү хөтөлбөрийг чиглүүлсэн.

Мөн макро эдийн засгийн орчин, хөрөнгийн зах зээлийн чиг хандлага, техникийн болон суурь шинжилгээ, дата аналитик, компанийн үнэлгээний талаарх орчин үеийн онол, арга зүйг үнэт цаасны компаниудын мэргэжлийн шинжээчдэд системтэйгээр эзэмшүүлэхийг зорьж байна.

Тус сургалтад Монголын хөрөнгийн биржид бүртгэлтэй үнэт цаасны компаниудаас 10 гаруй төлөөлөл хамрагдлаа.

МОНГОЛЫН ХӨРӨНГИЙН БИРЖ