Монголын хөрөнгийн биржийн 1-р ангилалд бүртгэлтэй "Сүү" ХК нь 2018 оны эхний хагас жилийн санхүү, үйл ажиллагааны тайлангаа Монголын хөрөнгийн бирж дээр 2018 оны 8 дугаар сарын 9-ний өдөр олон нийтэд нээлттэй танилцууллаа.

2018 оны эхний хагас жилд "Сүү" ХК-ийн цэвэр борлуулалтын орлого өмнөх оны мөн үетэй харьцуулахад 45 хувиар өсч, 35 тэрбум төгрөгт, цэвэр ашгийн хэмжээ 8.3 хувиар өсч, 2.2 тэрбум төгрөгт тус тус хүрсэн үзүүлэлттэй байна.

Компани нь тайлант хугацаанд шинэ техник, технологи нэвтрүүлснээс гадна 2017 онд олон нийтэд санал болгон худалдсан, хөрөнгийн зах зээлийн хамгийн өндөр үнийн дүнтэй компанийн өрийн хэрэгсэл болох "Сүү бонд"-ийн эргэн төлөлтийг хийсэн байна. Түүнчлэн, сүү бэлтгэн нийлүүлэгчдээ чадавхижуулах, тэднийг дэмжих чиглэлээр шат дараалсан ажлууд авч хэрэгжүүлсэн бөгөөд тайлант хугацаанд сүүний татан авалт өмнөх оны мөн үетэй харьцуулахад 51.4 хувиар нэмэгдсэн нь түүхий эдийн нийлүүлэлт нь хүртээмж багатай, улирлын хамааралтай үйлдвэрлэлийн хувьд чухал үзүүлэлт болсон байна. 

"Сүү" ХК-ийн олон нийтэд нээлттэй танилцуулсан тайланг бүрэн эхээр нь Энд дарж үзнэ үү. 

МОНГОЛЫН ХӨРӨНГИЙН БИРЖ