Монголын хөрөнгийн биржийн үнэт цаасны I ангилалд бүртгэлтэй "АПУ" ХК-ийн үнэт цаасны зах зээлийн үнэлгээ өнөөдөр 1,009,315,777,973.36 төгрөгт хүрснээр МХБ-д бүртгэлтэй 1 их наяд төгрөгийн үнэлгээтэй анхны компани боллоо.
Монголын хөрөнгийн биржид 1992 онд бүртгэгдсэн "АПУ" ХК-ийн нэгж үнэт цаас 1995 оны 9 дүгээр сарын 11-ний өдөр үнэт цаасны хоёрдогч зах зээлд 101 төгрөгөөр арилжигдаж эхэлснээр зах зээлийн үнэлгээ 75 сая төгрөгөөр тооцогдож байсан түүхтэй бөгөөд ийнхүү 26 жилийн дараа 1 их наяд төгрөгийн үнэлгээнд хүрсэн нь хөрөнгийн зах зээлийн үр шимийг 9,000 гаруй хувьцаа эзэмшигчдэдээ төдийгүй олон нийтэд харуулсан үйл явдал боллоо.
Хөрөнгийн зах зээлийн түүхэн хөгжилд үнэтэй хувь нэмэр оруулж байгаа 97 жилийн түүхтэй, хүнсний салбарын ууган үйлдвэр "АПУ" ХК-ийн нийт хамт олон, хөрөнгө оруулагчид, харилцагчид, хэрэглэгчид, түнш байгууллагууд та бүхэнд баяр хүргэе.
МОНГОЛЫН ХӨРӨНГИЙН БИРЖ