“Монголын хөрөнгийн бирж” ХК-ийн II ангилалд бүртгэлтэй “ПРЕМИУМ НЭКСУС" ХК-ийн Гүйцэтгэх захирлын орлогч Г.Чинзориг, Санхүү эрхэлсэн захирал Г.Бат-Эрдэнэ нар 2025 оны 7 дугаар сарын 31-ны өдөр 2025 оны эхний хагас жилийн үйл ажиллагааны тайлан, санхүүгийн үр дүнгээ танилцууллаа.

Тайлант хугацаанд:

2025 оны эхний хагас жилийн санхүүгийн үр дүн:

• Цэвэр борлуулалт 362.1 тэрбум төгрөгт хүрч, өмнөх оны эхний хагас жилээс 37.3%-иар өсөв.

• Нийт ашиг 68.3 тэрбум төгрөг болж, нийт ашгийн маржин 18.9%-д хүрчээ.

• Цэвэр ашиг 15.7 тэрбум төгрөг болсон нь өнгөрсөн оны эхний хагас жилийн үр дүнтэй харьцуулахад 47.6%-иар өссөн байна.

Компанийн нийт хөрөнгийн хэмжээ 2025 оны 6-р сарын 30-ны байдлаар 358.3 тэрбум төгрөгт хүрч, 2024 оны жилийн эцсээс 21.7 хувиар өсчээ. Нийт хөрөнгө 358.3 тэрбум дүнг задалж үзвэл:

• Эргэлтийн хөрөнгө: 101.7 тэрбум төгрөг байгаагийн 60.4 тэрбум нь бараа материал байна.

• Эргэлтийн бус хөрөнгө: 256.6 тэрбум төгрөг байгаагийн 170.4 тэрбум нь биет болон биет бус хөрөнгүүд байна.

• Оны эхэнтэй харьцуулахад, нийт хөрөнгийн хэмжээ 21.7% өссөн нь 50 шинэ дэлгүүр нээж, түүнийг дагасан дэд бүтцийн бүтээн байгуулалтуудыг хийсэнтэй холбоотой юм.

Өр төлбөр ба өмчийн бүтэц:

• Богино хугацаат өр төлбөр: 140.5 тэрбум төгрөг.

• Урт хугацаат өр төлбөр: 118.8 тэрбум төгрөг.

• Эздийн өмч: 99.0 тэрбум төгрөг болж, сүүлийн хоёр улирал дараалан өсөв.

• Компанийн хуримтлагдсан алдагдал өмнөх оны мөн үед 99 тэрбум байсныг 2 улирал дараалан ашигтай ажилласны үр дүнд 67 тэрбум болгож бууруулав.

2025 оны эхний хагас жилийн онцлох үйл явдлууд

• Улаанбаатар хотоос гадна алслагдсан бүс нутгуудад үйлчилгээний хүртээмжийг нэмэгдүүлэх зорилгоор Хөвсгөл, Баянхонгор, Дорнод аймгуудад шинээр CU Конвиниенс дэлгүүрийн салбаруудаа нээж, Монгол орны 15 аймагт хүрч 495 салбар дэлгүүртэй болсон байна.

• "Премиум Нэксус" ХК нь 2025 оны "Retail Asia Awards"-аас “Монгол Улсын оны шилдэг конвиниенс дэлгүүр” шагналыг хүртлээ.

Мөн "Премиум Нэксус" ХК нь Монгол Улсын ТОП 100 аж ахуйн нэгжийн жагсаалтад 7-р байрт эрэмбэлэгдэн, зах зээл дэх байр сууриа улам бэхжүүлсэн байна.

Та бүхэн “ПРЕМИУМ НЭКСУС" ХК-ийн  2025 оны жилийн хагас жилийн тайлангийн танилцуулгыг энд дарж үзнэ үү.

Шууд дамжуулалтыг “Монголын хөрөнгийн бирж” ХК-ийн албан ёсны фэйсбүүк хаягаар энд дарж үзнэ үү.