“Монголын хөрөнгийн бирж" ХК-ийн Уул уурхайн бүтээгдэхүүний арилжаа, бүртгэлийн газар (УУБАБГ)-аас өнөөдөр (2026.06.17) Уул уурхайн бүтээгдэхүүний биржийн арилжааны журмуудад нэмэлт, өөрчлөлт оруулахтай холбогдуулан бүтээгдэхүүн худалдагч, худалдан авагчид болон брокерын компани, зохицуулагч байгууллагуудын төлөөлөлд танилцуулах уулзалт, хэлэлцүүлгийг зохион байгууллаа.

• Монгол Улсын Засгийн газрын 2026 оны 4 дүгээр сарын 29-ний өдрийн 16 дугаар хуралдааны тэмдэглэл болох “Экспортыг нэмэгдүүлэх хүрээнд авч хэрэгжүүлэх зарим арга хэмжээ”-ний талаар даалгасан ажил үүргийн дагуу холбогдох журмуудыг илүү боловсронгуй болгох,
• Молибдены баяжмалыг уул уурхайн биржээр арилжаалах журам, дуудах доод үнийг тогтоох аргачлалыг олон улсын жишигт нийцүүлэн боловсруулах, батлуулах үүргийн хүрээнд холбогдох журмуудад нэмэлт, өөрчлөлт оруулахаар төслүүдэд тусгасан.

Хэлэлцүүлгийг УУБАБГ-ын Захирлын үүргийг түр орлон гүйцэтгэгч О.Батзаяа удирдан явуулж, дараах агуулгын хүрээнд дэлгэрэнгүй мэдээлэл хийсэн юм.

Үүнд:

• Уул уурхайн бүтээгдэхүүний биржийн арилжааны журмуудын нэмэлт, өөрчлөлтөөр зохицуулах харилцаа;

• Уул уурхайн бүтээгдэхүүний биржийн арилжааны журмуудын нэмэлт, өөрчлөлтийн ач холбогдол;

• Эрчим хүч, коксжих нүүрсний индексийн хөдөлгөөн болон, зэс молибдены баяжмалын металлын хөвөгч үнийг тооцох аргачлал;

• Худалдан авагчид үзүүлэх үйлчилгээний шимтгэлийн талаар тус тус дэлгэрэнгүй мэдээлэл өгч, төгсгөлд нь хэлэлцүүлэгт оролцсон 20 гаруй байгууллагын төлөөлөлтэй цаашид үүсч болох асуудал, шийдлийн талаар харилцан санал солилцлоо.

МОНГОЛЫН ХӨРӨНГИЙН БИРЖ