"Монголын хөрөнгийн бирж" ХК нь өнөөдөр (2026.07.01) Хувьцаа эзэмшигчдийн ээлжит бус хурал зохион байгууллаа.

Биржийн Төлөөлөн Удирдах Зөвлөл (ТУЗ)-ийн бүрэн эрхийн хугацаа дууссантай холбогдуулж хуулийн хугацаанд тус хурлыг зарласан бөгөөд Хурал даргалагчаар Сангийн дэд сайд Б.Хулан ажилласан юм.

Тэрээр “Ажлын хэсгээс сонгон шалгаруулалт зарласан хуулийн хугацаанд ТУЗ-ийн Ердийн гишүүнд 7, ТУЗ-ын Хараат бус гишүүнд 21 нэр дэвшигч холбогдох материалаа ирүүлснээс ТУЗ-ийн гишүүнд тавигдах шаардлага хангасан 19 нэр дэвшигчийн мэдээллийг энэ хурлаар хэлэлцүүлж, ТУЗ-ийн Ердийн 5 гишүүн, ТУЗ-ийн Хараат бус 4 гишүүнийг тус тус сонгоно” гэж мэдэгдээд, хурлыг дэгийг танилцуулснаар хурал албан ёсоор эхэлсэн.

Тооллогын комиссоос “Монголын хөрөнгийн бирж” ХК-ийн хувьцаа эзэмшигчдийн ээлжит бус хуралд 239,675,219 ширхэг энгийн хувьцаа эзэмшиж буй 20 хувьцаа эзэмшигч оролцохоор бүртгүүлсэн нь нийт саналын эрх бүхий 350,463,539 ширхэг хувьцааны 68.39 хувь болж байгааг хуралд оролцогчид болон хурлын даргад мэдээлээд, Компанийн тухай хуулийн 69 дүгээр зүйлийн 69.1, 69.2 дахь хэсэг, МХБ-ийн Дүрмийн 4 дүгээр зүйлийн 4.18 дэх хэсгийг тус тус үндэслэн нийт саналын эрхтэй энгийн хувьцааны 68.39 хувийн хувьцаа эзэмшигчид хуралд оролцож байгаа тул компанийн хувьцаа эзэмшигчдийн ээлжит бус хурлыг хүчин төгөлдөрт тооцлоо.

Санал хураалтын үр дүнд ТУЗ-ийн гишүүдийг сонгох тухай асуудалд хуралд оролцсон нийт хувьцаа эзэмшигчдийн 99.6 хувь буюу 238,723,920 ширхэг хувьцаатай 15 хувьцаа эзэмшигч саналын хуудсаар хүчинтэй санал өгсөн бөгөөд ТУЗ-ийн Ердийн болон Хараат бус гишүүдэд дараах нэр дэвшигчид сонгогдлоо.

Үүнд:

 Ердийн гишүүдэд

1. Т.Ганбаатар

2. Л.Энхбаяр

3. Б.Болормаа

4. Ш.Бат-Эрдэнэ

5. Г.Гийхнаран

Хараат бус гишүүдэд

1. Н.Отгончимэг

2. П.Баяр

3. Ж.Золзаяа

4. Х.Булгантамир нар тус тус шинээр сонгогдсон бөгөөд энэхүү Төлөөлөн Удирдах Зөвлөлийн бүрэн эрхийн хугацаа өнөөдрөөс хэрэгжиж эхэллээ.

МОНГОЛЫН ХӨРӨНГИЙН БИРЖ