2011 оны 04 сарын 29-ны өдөр “Эрдэнэс Tаван Tолгой” компанийн хувьцааг олон улсын хөрөнгийн биржид арилжаалах сэдэвт бага хурал зохион байгуулагдлаа. “Эрдэнэс Таван Толгой”-н хувьцааг гадаадын хөрөнгийн зах зээл дээр гарган хөрөнгө босгоход зөвлөж буй олон улсын нэр хүнд бүхий хөрөнгө оруулалтын банкууд хүрэлцэн ирж тус бүр илтгэл тавьжээ. Дойче банк нь “IPO гүйцэтгэлийн төлөвлөгөө”, Голдман сакс “Компанийн үнэлгээ ба үнэлгээнд нөлөөлөх гол үзүүлэлтүүд”, Би Эн Пи Парибас “Хоёр эсвэл гурван хөрөнгийн бирж дээр хувьцаа арилжаалах болон депозит хувилбар”, Маквэйри банк “Олон улсын уул уурхайн компаниудын IPO хийсэн туршлага, харьцуулалт” зэрэг сэдвүүдээр илтгэл тавьсан бөгөөд ирсэн зочид, төлөөлөгчтэй санал бодлоо солилцлоо. Хурлын үеэр Монголын хөрөнгийн бирж /МХБ/-ийн Төлөөлөн удирдах зөвлөлийн дарга Б.Болд биржийн өнгөрсөн, одоо, ирээдүй гэсэн сэдвээр илтгэл тавьж МХБ-ийн үйл ажиллагааг танилцууллаа. Мөн Лондонгийн хөрөнгийн бирж болон Хонконгийн хөрөнгийн биржийнхэн “Эрдэнэс Таван Толгой”–н хувьцааг өөрсдийн бирж дээр гаргахад ямар журам баримтлах талаар зөвлөгөө өгч, тухайн биржүүд дээр амжилттай хувьцаа гаргасан Монгол компанийн туршлагын талаар ярилцлаа.