“Монголын хөрөнгийн бирж” ХК-иас зохион байгуулдаг “Үнэт цаасны зах зээлийн анхан шатны мэдлэг олгох сургалтын 11 дүгээр сарын хөтөлбөр өндөрлөлөө.

Энэ удаагийн сургалтад 24 суралцагч хамрагдсан бөгөөд нийт 12 багц хөтөлбөрийг дуусган, сертификатаа гардан авлаа.

“Монголын хөрөнгийн бирж” ХК-ийн Гүйцэтгэх захирал Х.Алтай Хөрөнгийн зах зээлийн чиг хандлага, Монгол Улсад хийгдсэн банкны реформ болоод ТӨХК-иудын хувьчлалын үйл явц, Уул уурхайн биржийн арилжааны үр нөлөөгөөр эдийн засгийн үзүүлэлт хэрхэн нэмэгдэж буй талаар дэлгэрэнгүй мэдээлэл өгсөн.

АПУ ХК-ийн Хуулийн зөвлөх, суралцагч А.Анужин: “Манай байгууллагын хуулийн албанаас хэд хэдэн хүн энэхүү сургалтад хамрагдлаа. Богино хугацаанд маш үр өгөөжтэй цогц хичээлээр мэдлэг мэдээллээ тэлсэндээ баяртай байна” хэмээн сэтгэгдлээ хуваалцсан юм.

30 гаруй жилийн түүхтэй “Монголын хөрөнгийн бирж” ХК хүртээмжтэй хөрөнгийн зах зээлийг хөгжүүлэх зорилгодоо тулгуурлаж 2005 оноос энэхүү сургалтыг зохион байгуулж ирсэн.

Сургалтын зорилго нь хөрөнгийн зах зээлд ажиллах мэргэжлийн боловсон хүчний эрэлт, хэрэгцээг хангах, олон нийтэд үнэт цаасны зах зээлийн мэдлэг олгох замаар салбарын хөгжилд тодорхой хувь нэмэр оруулахад чиглэн, өнөөг хүртэл 15 мянган гаруй иргэнийг хамруулаад байна.

МОНГОЛЫН ХӨРӨНГИЙН БИРЖ