Монгол Улсын Засгийн газар дэлхийн хөрөнгө оруулалтын менежментийн тэргүүлэгч байгууллагуудын нэг Franklin Templeton компанитай Харилцан ойлголцлын санамж бичиг байгуулж, төрийн өмчит компаниудыг дотоод болон олон улсын хөрөнгийн биржид давхар бүртгэлтэйгээр нийтэд санал болгох (Dual Listing IPO) боломжийг хамтран судлах ажлыг эхлүүллээ.

Санамж бичгийн хүрээнд төрийн өмчит компаниудын засаглал, ил тод байдал, үнэлгээ, санхүүгийн болон үйл ажиллагааны бэлэн байдлыг олон улсын жишигт нийцүүлэн сайжруулж, хувьцааны тодорхой хэсгийг хөрөнгө оруулалтын санд төвлөрүүлэн дотоод болон олон улсын хөрөнгийн биржээр дамжуулан хөрөнгө оруулагчдад санал болгох боломжийг судална.

Мөн төрийн өмчит компаниудын IPO-д бэлтгэх, үнэлгээ, эрэмбэлэлт, хөрөнгө оруулагчдын эрэлтийг тодорхойлох, Үндэсний хөрөнгө оруулалтын сангийн бүтэц, хэрэгжүүлэх үе шат, замын зураглалыг боловсруулах чиглэлээр хамтран ажиллах юм.

Энэхүү санаачилга нь төрийн өмчит компаниудын засаглалыг шинэ шатанд хүргэхийн зэрэгцээ Монголын хөрөнгийн зах зээлийг олон улсын зах зээлтэй холбож, дотоодын хөрөнгийн биржийг олон улсын зах зээлтэй уялдуулан хөгжүүлэх, гадаадын институцийн хөрөнгө оруулагчдыг татах, Монголын үнэт цаасыг олон улсын хөрөнгийн зах зээлд хүргэх шинэ боломжийг бүрдүүлэх ач холбогдолтой юм.

МОНГОЛЫН ХӨРӨНГИЙН БИРЖ