2013 оны 5 дугаар сарын 24-ны өдөр “Үнэт цаасны тухай хууль”-ийн шинэчилсэн найруулга батлагдаж, мөрдөгдөж эхэлснээр гадаадын хөрөнгийн биржид бүртгэлтэй хувьцаат компаниуд Монгол Улсад, Монгол Улсын хөрөнгийн биржид бүртгэлтэй хувьцаат компаниуд олон улсад давхар бүртгэл хийлгэх замаар хувьцаагаа арилжаалах эрх зүйн орчин нээлттэй болсон билээ.

“Монголын хөрөнгийн бирж” ТӨХК нь энэхүү эрх зүйн боломжийг бодит ажил хэрэг болгохоор зах зээлийн зохицуулагч болон оролцогч байгууллагуудтай хамтран ажиллаж, холбогдох дүрэм, журмуудад шаардлагатай нэмэлт, өөрчлөлтүүдийг оруулах ажлуудыг эхлүүлээд байна.

Санхүүгийн зохицуулах хорооны 2017 оны 7-р сарын 20-ны өдрийн хуралдаанаар “Үнэт цаасны зах зээлийн тухай” хуулийн 14 дүгээр зүйлийн 14.2, 18 дугаар зүйлийн 18.4 дэх заалтуудын дагуу Монголын хөрөнгийн биржийн саналыг үндэслэн "Монгол Улсад үнэт цаас гаргаж болох гадаадын үнэт цаас гаргагчийн бүртгүүлсэн арилжаа эрхлэх байгууллагын түр жагсаалт" болон "Монгол Улсын хадгаламжийн бичгийн суурь үнэт цаасны бүртгэл бүхий харьяалах улсын түр жагсаалт"-ыг тус тус батлан гаргасан байна. 

Энэхүү шийдвэр нь хөрөнгө оруулагчдын эрх ашгийг хамгаалах сайн тогтолцоо бүхий 26 хөрөнгийн биржид бүртгэлтэй компанийн хувьцаа, 24 улсад бүртгэлтэй үнэт цаасанд суурилсан хадгаламжийн бичгийг Монголын хөрөнгийн зах зээлд арилжихад дотоодод мөрдөгдөж буй холбогдох дүрэм, журмын шалгуур, шаардлагаас хөнгөлөх, чөлөөлөх боломжийг бүрдүүлэх юм. Ингэснээр Монгол Улсад үйл ажиллагаа явуулдаг, гадаадын нэр бүхий 5 хөрөнгийн биржид хувьцаа нь арилжаалагдаж буй 30 гаруй компанийн үнэт цаасыг дотоодын хөрөнгийн биржээр арилжаалахын зэрэгцээ ард иргэд эдгээр компаниудын хувьцааг эзэмшиж, ашиг шимийг нь хүртэх боломж илүү ойртож байна.

СЗХ-ны шийдвэрийн дэлгэрэнгүйг Энд дарж үзнэ үү.

МОНГОЛЫН ХӨРӨНГИЙН БИРЖ