Монгол Улсын Их хурлын 2010 оны 2 дугаар сарын 4-ний өдрийн 11 дүгээр тогтоол, Монгол Улсын Засгийн газрын  2010 оны 5 дугаар сарын 12-ны өдрийн 115 дугаар тогтоолын дагуу дотоодын хөрөнгийн зах зээлийг олон улсын жишигт нийцүүлэн хөгжүүлэх зорилгоор 2011 оны 4 дүгээр сард Төрийн өмчийн хороо, Монголын хөрөнгийн бирж нь “Лондонгийн хөрөнгийн бирж групп”–тэй стратеги хамтын ажиллагааны “Ажлын Мастер гэрээ”–г 3 жилийн хугацаатай байгуулсан билээ. Тус гэрээний хүрээнд зах зээлийн дэд бүтэц, хууль дүрэм журмуудыг шинэчилсэн зэргээр олон дорвитой ажлууд хийгдсэний нэг нь олон улсын стандартын  “Миллениум Ай Ти” системийг Монголын зах зээлд нэвтрүүлсэн явдал юм.
 
Энэхүү систем нь Лондонгийн хөрөнгийн бирж, Хонг Конгийн хөрөнгийн бирж, Италийн хөрөнгийн бирж, Сингапурын хөрөнгийн бирж зэрэг дэлхийн нэр хүнд бүхий биржүүдийг оролцуулан, олон улсын хэмжээнд 20 гаруй орон 30 гаруй хөрөнгийн бирж санхүүгийн байгууллагууд ашигладаг арилжаа, төлбөр тооцоо, хадгаламж, хяналтын цогц систем юм. Энэхүү системийг Монголын хөрөнгийн зах зээлд 2012 оны 7 дугаар сарын 2-ны өдөр нэвтрүүлснээс хойш өдгөө 1 жилийн хугацаанд эвдрэл саатал гараагүй хэвийн ажиллаж байна.

“Миллениум Ай Ти” системийг олон улсын стандартад хэр нийцэж байгааг хөндлөнгийн аудитын байгууллагаар шалгуулах тухай саналыг Үнэт цаасны арилжаа эрхлэгчдийн холбооноос хэвлэлийн бага хурлаар дамжуулан шууд бусаар гаргасан билээ. Монголын хөрөнгийн биржийн зүгээс энэхүү саналыг дэмжиж хүлээн авч байгаа бөгөөд олон улсын хэмжээнд үйл ажиллагаа явуулж буй нэр хүнд бүхий хөндлөнгийн аудитын байгууллагуудаар (Big Four) шалгуулахад бэлэн байна.

 

 

Мэдээллийн алба

МОНГОЛЫН ХӨРӨНГИЙН БИРЖ