Хөрөнгийн зах зээл үүсч, МХБ байгуулагдсаны түүхт 30 жилийн ой тохиож буй 2021 онд хөрөнгийн зах зээлийн үнэлгээ, арилжааны хэмжээ, ТОП-20 индекс, шинээр бүртгүүлсэн үнэт цаасны тоо зэрэг хөрөнгийн биржийн гол үзүүлэлтүүд 30 жилийн түүхэн дээд үзүүлэлтүүддээ хүрч, энэхүү өсөлтийг дотоодод төдийгүй олон улсад онцолж байна. Тухайлбал, олон улсын санхүүгийн зах зээлийн голлох мэдээллийн агентлаг болох Bloomberg-ээс МХБ-ийг дэлхийн хамгийн өндөр өсөлттэй зах зээлээр онцолсон бөгөөд үүнд зах зээлийн ерөнхий чиг хандлагыг  тодорхойлогч ТОП 20 индексийн үзүүлэлт 2021 оны 12-р сарын 5-ны байдлаар 104 хувь буюу 2 дахин өссөн нь голлох нөлөөллийг үзүүлсэн юм. 

Энэхүү өсөлтийн зэрэгцээ дэлхийд тэргүүлэгч санхүүгийн судалгааны агентлаг болох Их Британийн FTSE Russell группээс Монголын хөрөнгийн зах зээлийг 2021 оны 9 сард “Хөгжиж буй зах зээл”-ийн “Ажиглалтын жагсаалт”-нд оруулсан нь дотоодын зах зээлийг олон улсын хэмжээнд таниулж, олон улсын мэргэжлийн хөрөнгө оруулагчдыг зах зээлд нэвтрүүлэхэд чухал дэмжлэг болох бөгөөд цаашид зах зээлийн арилжааны идэвх, хөрвөх чадварыг нэмэгдүүлж, хөгжлийг хурдасгах нөхцөлийг бүрдүүлж байгаа юм.

Компанийн санхүү, эдийн засгийн үзүүлэлт болон үр ашгийн хувьд 2021 онд үйл ажиллагаанаас нийт 5.5 тэрбум төгрөгийн орлогыг олж, 2.2 тэрбум төгрөгийн зардал гаргаж, 2.1 тэрбум төгрөгийн хуримтлагдсан өр төлбөрийг барагдуулж, Улсын төсөвт нийт 530.8 сая төгрөгийн татвар, хураамжийг зохих хуулийн хугацаанд нь бүрэн төлж, татварын дараах цэвэр ашгийг 3.2 тэрбум төгрөгт хүргэж ажилласан нь компанийн 30 жилийн түүхэнд онцлох өндөр үзүүлэлт боллоо.

Монголын хөрөнгийн биржийн 2021 оны голлох үзүүлэлтүүд, санхүүгийн болон үйл ажиллагааны тойм мэдээлэлтэй танилцана уу.